Մարտակերտում վերացնում են պատերազմի վնասները

Երեւան: Մեդիամաքս: Մարտակերտի շրջանում սկսվել է լայնածավալ մարտական գործողությունների արդյունքում գրանցված վնասի վերականգնողական աշխատանքները:

Այս մասին Մեդիամաքսին հայտնել է Մարտակերտի շրջանի վարչակազմի ղեկավար Վլադիկ Խաչատրյանը՝ նշելով, որ տարհանված համայնքների բնակիչները դեռեւս չեն վերադարձել իրենց մշտական բնակության վայրերը:

«Մատաղիսում եւ Տոնաշենում գրեթե ավարտվում են հակառակորդի կողմից հասցված վնասի վերականգնման աշխատանքները: Համայնքներ են վերադարձել միայն տղամարդիկ՝ մասնակցելու վերոնշյալ աշխատանքներին ու տեր կանգնելու իրենց տներին եւ ընտանի կենդանիներին»,-ասել է նա:

Աշխատանքներ են տարվում նաեւ Թալիշին հասցված վնասի վերականգնման  եւ համայնքի էլեկտրասնուցման ապահովման ուղղությամբ:

Անդրադառնալով Մարտակերտ քաղաքին՝ Վլադիկ Խաչատրյանը նշել է, որ այնտեղ առաջնահերթ աշխատում են վերականգնել դպրոցի շենքին հասցված վնասը՝  ապրիլի 11-ից դասերը վերսկսելու համար:

Թալիշում եւ Մատաղիսում դպրոցները վերաբացելը դեռ վաղ են համարում:

ԼՂՀ վարչապետի մամուլի խոսնակ Արտակ Բեգլարյանի փոխանցմամբ՝ կառավարությունը հոգ է տանում ռազմական գործողությունների հետեւանքով, հատկապես՝ Թալիշ եւ Մատաղիս գյուղերից տարհանված բնակիչների մասին:

«Տարհանված քաղաքացիների համար Ստեփանակերտի սննդի օբյեկտներից մեկում անվճար սնունդ է պատրաստվում, իսկ կենցաղային իրերի եւ հագուստի հարցում օգնություն է տրամադրվում օպերատիվ շտաբի կողմից», — ասել է Արտակ Բեգլարյանը:

Источник: www.mediamax.am