«Անուշ» օպերայի նոր բեմադրության ստեղծագործական խմբի պատասխանը մտավորականներին
Subscribe by RSS or Email
"Սոսի" հեռուստատեսություն » Նորություններ » «Անուշ» օպերայի նոր բեմադրության ստեղծագործական խմբի պատասխանը մտավորականներին


«Անուշ» օպերայի նոր բեմադրության ստեղծագործական խմբի պատասխանը մտավորականներին

 

Հեղինակ.

 

«Անուշ» օպերայի նոր բեմադրության ստեղծագործական խմբի պատասխանը մտավորականներին


«Անուշ» օպերայի նոր բեմադրության ստեղծագործական խումբը պատասխանել է մտավորականների կողմից Սերժ Սարգսյանին ուղղված բաց նամակին:Պատասխանում մասնավորապես ասվում է.

«Խորին հարգանքով վերաբերվելով նշված նամակի տակ ստորագրած վաստակաշատ և հարգարժան արվեստագետներին՝ չենք կարող անպատասխան թողնել անձնական վիրավորանքներ ու սպառնալիքներ պարունակող, զրպարտություն և ապատեղեկատվություն տարածող այդ գրությունը, որն իր բովանդակությամբ և ձևով հիշեցնում է նախորդ դարի կեսերին բնորոշ գործելաոճ և ոչ միայն հարիր չէ ազգի մտավորականության սերուցքին, այլև կասկածի տակ է դնում երևույթին սթափ աչքերով նայելու նրանց ընդունակությունը: Վերոհիշյալ անձինք ուշադիր չեն կարդացել ներկայացման հայտագիրը, որտեղ հայերեն լեզվով գրված է` «Անուշ» օպերայի նոր բեմականացում՝ Ա. Տիգրանյանի օպերայի հիման վրա, ըստ Հ. Թումանյանի պոեմի: Ինչը չի նշանակում, որ «Անուշ»-ի ադապտացիան և բեմականացումը նախաձեռնած ու իրականացրած արվեստագետների խումբը որևէ կերպ կասկածի տակ է դնում ստեղծագործության բնօրինակի և նախորդ բեմականացումների գեղարվեստական արժեքը. ավելին, նոր մեկնաբանություն տալով գործին՝ նպատակ ունի այն ներկայացնել արդիական, ժամանակակից հարթության վրա՝ ուրույն արտահայտչամիջոցներով և գեղագիտությամբ՝ առանց խախտելու նրա ձևն ու բովանդակությունը, փորձելով, սակայն, հանդես բերել դասականից տարբեր մոտեցում: Դրա իրավունքը սահմանված է ազատ արտահայտման ՀՀ քաղաքացիների հետևյալ սահմանադրական իրավունքով` «Հոդված 27. Յուրաքանչյուր ոք ունի իր կարծիքն ազատ արտահայտելու իրավունք: Արգելվում է մարդուն հարկադրել հրաժարվելու իր կարծիքից կամ փոխելու այն: Յուրաքանչյուր ոք ունի խոսքի ազատության իրավունք, ներառյալ՝ տեղեկություններ և գաղափարներ փնտրելու, ստանալու, տարածելու ազատությունը, տեղեկատվության ցանկացած միջոցով՝ անկախ պետական սահմաններից: Լրատվամիջոցների և տեղեկատվական այլ միջոցների ազատությունը երաշխավորվում է։ Պետությունը երաշխավորում է տեղեկատվական, կրթական, մշակութային և ժամանցային բնույթի հաղորդումների բազմազանություն առաջարկող անկախ հանրային ռադիոյի և հեռուստատեսության առկայությունն ու գործունեությունը»։

ՀՀ Սահմանադրության 40-րդ հոդված` «Յուրաքանչյուր ոք ունի գրական, գեղարվեստական, գիտական և տեխնիկական ստեղծագործության ազատության, գիտության նվաճումներից օգտվելու ու հասարակության մշակութային կյանքին մասնակցելու իրավունք»:

Հակառակ նախագծի և դրա հեղինակների «ընդդիմախոսների» պնդումներին՝ որևէ իրավական կամ բարոյական նորմով արգելված չէ դասական ստեղծագործության ադապտացիան, ավանդականից այլ մեկնաբանությունը կամ կատարումը, ուստի նոր «Անուշ»-ը պրոֆեսիոնալ, մասնագիտական բարձր որակավորում ունեցող և նվաճումների հասած հայ ու ֆրանսիացի արվեստագետների համատեղ ստեղծագործական գործընթացի արդյունք է: Ցանկացած ստեղծագործական աշխատանքի վերջնանպատակն ու առաքելությունը նոր խոսք, նոր հայացք, հեղինակային մոտեցում ներկայացնելն է, հետևաբար առնվազն միամտություն է կարծել, որ հեղինակները պետք է կրկնեին օպերայի նախորդ՝ դասական դարձած բեմականացումը: Հարկ ենք համարում նշել, որ լիբրետոյի ադապտացիայի և բեմականացման հեղինակ Սերժ Ավեդիկյանն ու երաժշտության վերամշակման և գործիքավորման հեղինակ Անահիտ Սիմոնյանը, սթափ գիտակցելով հայ գրականության և երաժշտարվեստի այս գոհարին անդրադառնալու ողջ պատասխանատվությունը, խորապես ուսումնասիրել են «Անուշ»-ի արխիվային նյութերը (լիբրետոյի և պարտիտուրայի բնօրինակները), որոնք պահվում են Ե. Չարենցի անվան Գրականության ու արվեստի թանգարանում և, ի դեպ, մինչ օրս չէին արժանացել որևէ մասնագետի կամ այլ հետաքրքրված անձի ուշադրությանը:

Խնդրում ենք նամակը ստորագրած անձանց վերընթերցել Հ. Թումանյանի «Անուշ» պոեմը և համոզվել, որ նոր բեմադրությունը չի մեղանչում ստեղծագործության բնօրինակի հանդեպ, ու կամովին հրաժարվել մեզ հասցեագրված անհիմն մեղադրանքներից: Մի կողմ թողնելով բանավեճը «Անուշ»-ի այս մեկնաբանության գեղագիտական և գեղարվեստական որակների մասին` որը, սակայն, շատ փոքր մասն է կազմում վերոհիշյալ նամակի՝ ցանկանում ենք հատուկ ընդգծել անընդունելի զրպարտության փորձը, որը վերաբերում է նախագծի ֆինանսական կողմին: Վաստակաշատ մտավորականների կողմից հիշատակվող գումարի չափը (իբր 35 000 եվրո է ծախսվել դեկորի մաս կազմող ապակե կամրջի վրա) որևէ աղերս չունի իրականության հետ և հեշտությամբ կարող է որակվել որպես զրպարտություն՝ ՀՀ օրենսգրքով պատժելի գործողություն: Անհրաժեշտության դեպքում կարող ենք ներկայացնել բեմադրության բյուջեն։ Հաշվի առնելով, որ ստալինյան ժամանակներն անցել են և մենք ապրում ենք 21-րդ դարում՝ վերոհիշյալ անձանց կոչ ենք անում այսուհետ զերծ մնալ մամուլում և կյանքում ստեղծագործական անձնակազմի, առավել ևս՝ երիտասարդ խոստումնալի արտիստների նկատմամբ սպառնալիքներից: Բարոյականության քարոզի ու զրպարտանքի խառնուրդ այս գրությունը, որով փորձ է արվում կանխել հայ-ֆրանսիական «Անուշ» նախագծի առաջխաղացումը, ոչ այլ ինչ է, եթե ոչ բռնատիրական մտածելակերպի և գործելաոճի արտահայտություն, որն անընդունելի է ժողովրդավարության ուղին բռնած ժամանակակից երկրի եւ նրա քաղաքացիների համար:

Անկախ այն հանգամանքից, թե «Անուշ»-ի նոր մեկնաբանությունն ինչ գեղարվեստական ու գեղագիտական արժեք է ներկայացնում և ինչ ընդունելություն է գտել լայն հանրության ու մասնագետների շրջանում, անընդունելի է որևէ մտավորականի կողմից (անկախ նրա վաստակից) մշակութային կյանքի այս կամ այն իրադարձությունն արգելելու պահանջագիր ներկայացնելը, ինչը ոչ միայն այլոց իրավունքները սահմանափակելու փորձ է, այլև դրա հեղինակների ներքին անազատության ցցուն վկայություն»:

Հիշեցնենք, որ մի խումբ մտավորականներ նամակ էին հղել նախագահ Սերժ Սարգսյանին, որտեղ քննադատելով «Անուշ» օպերայի նոր բեմականացումը, կոչ էին անում արգելել բեմադրությունը Ֆրանսիայում:

http://vemard.com/
Մեկնաբանություններ չկան

Ավելացնել մեկնաբանություն!